TAKUKURU yaagizwa kuchunguza Ufisadi Skimu ya Umwagiliaji Mombo

 

Mkuu wa Mkoa wa Tanga Mhe. Chiku Gallawa ameiagiza taasisi ya kuzuia na kupambana na rushwa (TAKUKURU) kumchunguza Afisa Kilimo wa Wilaya ya Korogwe Bw. Rugembe Kakuru kutokana na utata wa matumizi ya zaidi ya shiling million  200 za Skimu ya mpunga ya Mombo.

Mradi wa umwagiliaji Skimu ya  Mombo ilipata zaidi ya shilingi million 200  tangu January mwaka jana na licha ya kuwepo kwa fedha hizo mpaka sasa hakuna kilichofanyika jambo linalotia shaka.

Mhe. Gallawa aliitaka taasisi hiyo kumchunguza Afisa huyo kuhusiana na mazingira ya uendeshaji wa zoezi la ukarabati wa mfereji wa skimu hiyo pamoja na kufanya michoro kwa shilingi Milioni 100 jambo alilolieleza kuwa ni ufisadi wa mali ya Umma.

“Bwana takukuru hebu niambie kufanya Cotetion kwa shilingi milion 100 wewe inakuingia kichwani kweli……huyu bwana (Afisa kilimo Wilaya) muwe naye aeleze vizuri, ama tumshughulikie  wenyewe” alisema Mhe. Gallawa wakati akimkabidhi  Afisa huyo mikononi mwa taasisi hiyo.

Mhe.Gallawa ambaye alikuwa katika ziara ya siku tano kukagua  miradi na kuhamasisha shughuli za maendeleo Wilayani Korogwe alieleza kuwa haoni sababu za msingi zilizofanya ukarabati wa mfereji  wa mradi huo kusimama wakati fedha zilishaingizwa na kudai kuwa huo ni uzembe na njama za wataalamu kudhoofisha juhudi za serikali na wananchi.

Hata hivyo akizungumza katika mkutano na wanaushirika wa mradi huo Mhe.  Gallawa alitumia nafasi hiyo  kuwataka wananchi kuisaidia serikali kwa kutoa taarifa za viongozi wenye tabiaza  kukwamisha  maendeleo ikiwemo ufujaji wa mali za Umma ili kuwezesha kuchukuliwa hatua kabla hawajaleta hasara kubwa.

Afisa  Kilimo wa Wilaya ya Korogwe Bw. Rugembe Kakuru akitolea ufafanuzi utata wa matumizi ya millioni 200 ya skimu ya Mpunga ya Mombo kwa Mkuu wa Mkoa Mhe.Chiku Gallawa

Meneja wa Skimu ya Umwagiliaji ya Mombo Bw. Mwenda akielezea maendeleo ya Skimu hiyo  kwa Mkuu wa Mkoa Mhe. Chiku Gallawa