OCD LUSHOTO AWAASA WAENDESHA BODABODA

Mkuu wa Polisi wilaya ya Lushoto, Magafu Abdallah amesema Jeshi la Polisi wilayani humo litahakikisha linawakamata waendesha bodaboda  waliopo Wilayani humo ambao watabainika wamevunja sheria za usalama barabarani kwa kupakia abiria zaidi ya mmoja na kutokuvaa kofia ngumu wanapokuwa wakiendesha.

Akiongea ofisini kwake, amesema sheria za usalama barabarani  zimeendelea kuvunjwa licha ya elimu ya kutosha juu ya upakiaji wa abiria na kuwa na leseni za kuendesha vyombo . Kushindwa kutimiza masharti ya usalama barabarani kumehatarisha usalama wa abiria.

 “Pikipiki nyingi hazijasalijiwa na mamlaka ya mapato nchini TRA, tumekuwa tukiwaelimisha watu kuvaa kofia ngumu kwa ajili ya usalama wao lakini wanakuwa wabishi nadhani njia nzuri ni kuwakamata wale wote wanaokiuka utaratibu huo ili waweze kuchukuliwa hatua zinazostahili “Alisema Abdallah.

Hata hivyo amesema asilimia 90 za ajali zinatokana na uzembe wa madereva wanaoendesha vyombo hivyo kwa kutokufuata misingi na sheria ambazo zimewekwa na hivyo kupelekea ajali za mara kwa mara ambapo aliwataka kuzingatia sheria ili kuepukana na ajali.

Wananchi pia wameaswa kuwa mstari wa mbele kuwasaidia waendesha bodaboda hao kufuata sheria za usalama barabarani kwa kukataa kupanda kwenye vyombo hivyo vya usafiri kama hawana kofia .