YANGA NA MGAMBO SHOOTING KUCHUANI VIKALI JUMATANO HII VIWANJA VYA MKWAKWANI

YANGA AFRICAN

MGAMBO SHOOTING

Kocha Mkuu wa timu ya Mgambo Shooting, Mohamed Kampira amesema mchezo wa Ligi kuu Tanzania bara kati yao na Dar es Salaam Yanga African unaotarajiwa kuchezwa Jumatano  tarehe 17/04/2013 saa 10 jioni kwenye uwanja wa Mkwakwani Mkoani Tanga hauwapi wasiwasi wala  kuwanyima usingizi kwani kwao wanauona kama mchezo wa kawaida katika ligi hiyo.

Kampira aliyasema hayo jana mara baada ya kumalizika kwa mazoezi yao ya asubuhi ambapo alisema maandalizi ya mechi hiyo licha ya wapenzi na mashabiki wa soka hapa nchini kuitabiria kuwa itakuwa ni ngumu lakini wao wanaiona kama yakawaida sana kutokana na uimara wa kikosi chao.

Alisema kuwa kikosi hicho hivi sasa kipo imara kwa ajili ya kupambana na timu yoyote ili iweze kutimiza malengo yao ambayo wamejiwekea ya kuhakikisha wanamalizia ligi hiyo wakiwa kwenye nafasi tano za juu kwenye msimamo.

 Nao Umoja wa Wanachama wa Klabu ya Yanga mkoa wa Tanga umeanza shamra shamra za kuwapokea viongozi wa timu hiyo ambao watawasili mkoani hapa siku moja kabla ya kuchezwa mechi hiyo ambayo inatarajiwa kuwa yenye ushindani mkubwa.

Katibu wa Matawi ya Yanga mkoa wa Tanga,David Manyilizu alisema mapokezi ya viongozi hao yanatarajiwa kufanyika katika njia ya Panda ya Segera wilayani Handeni na Pongwe jijini Tanga ambapo wapenzi na wanachama wa klabu hiyo wataungana ili kuwalaki viongozi hao