Wakazi wa Mkoa wa Tanga waonyesha Mshikamano katika mapokezi ya Mwenge wa Uhuru 2013.

Mkuu wa Mkoa wa Tanga Mhe .Chiku Gallawa akiupokea Mwenge wa Uhuru ambao umetokea Mkoa wa Mjini Magharibi kwa lengo la Kukimbizwa katika Wilaya zote za Mkoa wa Tanga. Mbio za Mwenge wa Uhuru mwaka huu, zimebeba ujumbe usemao: “Watanzania ni  Wamoja” wenye kauli mbiu “ Tusigawanywe kwa misingi ya Tofauti zetu za Dini, Itikadi, Rangi na Rasilimali” Lengo la Ujumbe na Kauli Mbiu hii ni kutoa msisitizo kwa Wananchi juu ya umuhimu wa kuimarisha Umoja  na Amani katika jamii .

Kiongozi wa mbio za Mwenge wa Uhuru Kitaifa Bw. Juma Ali Simai akiweka jiwe la msingi kwenye mradi wa Barabara za viwandani eneo la Gofu Viwandani. Mradi huo unategemea kunufaisha wawekezaji wengi na wananchi kwa ujumla.

Wakazi wa Wilaya ya Tanga wakifurahia ufunguzi wa Ofisi ya Mtendaji Kata ya Ngamiani. Wakazi hao wameweza kudhihirisha kuwa wao ni wamoja na maendeleo ya Tanga ni ya wote . Mradi huo ni miongoni mwa miradi mbalimbali iliyofunguliwa na iliyozinduliwa wakati wa kukimbiza mwenge wa Uhuru katika Wilaya ya Tanga ikiwemo uzinduzi wa jengo la Wazazi katika Zahanati ya Duga, Mradi wa kusambaza Umeme katika eneo la  Sahare,kituo cha kukusanya maziwa Kichangani, ufunguzi wa mradii wa Maabara katika shule ya secondary ya Wasichana St Christina, uzinduzi wa vikoba na uzinduzi wa  Club ya Wapinga Rushwa . Miradi yote wilayani Tanga imegharimu kiasi cha fedha  za kitanzania 8,580,270,458.

 

Vijana wa halaiki  wakiyapamba mapokezi ya Mwenge wa Uhuru katika Wilaya ya Tanga. Wilaya pia ilijiandaa  vyema kwa burudani mbalimbali na kufanikisha sherehe za mapokezzi kufana.

Mkuu wa Wilaya ya Tanga Mh Halima Dendegu akitoa neno la shukurani kwa wakazi wa Tanga na vijana wakimbiza Mwenge mara tu baada ya  risala ya Utii kwa Mhe. Jakaya Mrisho Kikwete , Rais wa Jamhuri ya Muungano wa Tanzania.

Baadhi ya wakazi wa Tanga  waliofika katika uwanja wa ndege wa Tanga kuupokea mwenge wa Uhuru.