Wilaya ya Korogwe yapongezwa kwa kuonyesha ushirikiano katika shughuli za maendeleo

Mkuu wa Mkoa wa Tanga Mhe. Chiku Gallawa ameipongeza Wilaya ya Korogwe  kwa kuonyesha ushirikiano katika shughuli za maendeleo. Hayo ameyasema wakati akiongea na watumishi wa Halmashauri Mji na Halmashauri ya Korogwe Vijijini mara baada ya kuwasili Wilayani hapo  jana kwa ziara ya  kikazi ya siku tatu na pia katika Mkutano wa Hadhara uliofanyika katika Kata ya Mpale.

“ Nawapongeza kwa kuonesha dalili nzuri ya  ushirikiano, siri ya yote haya ni kujituma na upendo, Hamasa yenu isiishie katika ujenzi wa maabara bali pia tuangalie uboreshaji wa suala zima la elimu kuanzia shule za msingi hadi sekondari” amesisitiza mkuu huyo.

 Wilaya ya Korogwe imejiwekea mkakati kazi kutekeleza agizo la kitaifa  lililotolewa na Rais wa Jamhuri ya Muungano wa Tanzania Mhe. Jakaya Mrisho Kikwete la kila shule ya sekodari kujengewa maabara ili kuwajengea uwezo wanafunzi wa masomo ya  masomo ya sayansi.

Imekubalika kuwa Mkuu wa Wilaya atachangia bati 20, Wakurugenzi bati 10 kila mmoja ,Watumishi wa wilaya ya  Korogwe kuchangia mabati moja kila mmoja , kila kijiji kimejiwekea lengo la kuchangia matofali na mkazi yeyote mwenye kipato kuchangia shilling elfu kumi (10,000) ili kufanikisha ujenzi huo.

Naye Mkuu wa Wilaya Mhe. Mrisho Gamba amekiri kuwa ni wajibu wake kutekeleza maagizo ya Rais na haoni sababu ya kutafuta visingizio vya kutojenga maabara kama ilivyoagizwa na Mhe. Jakaya Kikwete, Rais wa Jamhuri ya Muungano wa Tanzania kwa lengo la kuboresha  sekta ya Elimu nchini.

“Sisi Wilaya ya Korogwe tumezingatia maagizo ya Rais na Maelekezo yako Mkuu wa Mkoa na kuamua kuhamasishana ili kujenga maabara na kazi hiyo tumeianza kwa kazi ya ajabu” aliongezea Mhe. Gambo.

Hata hivyo tayari ujenzi umeshaanza Kata ya Mpale na Mkuu wa Mkoa amefanikiwa kuzindua ujenzi wa maabara ya vyumba vitatu katika shule ya sekondari Patema iliyopo kata ya Mpale mbavyo msingi wake ulishachimbwa.

Wakiunga mkono juhudi hizo, Mkuu wa Mkoa Mhe. Chiku Gallawa ameahidi kuchangia shilingi milioni mbili, Mbunge wa Korogwe vjijini Mhe. Steven Ngonyani Majimarefu amechangia fedha  taslimu laki tano na Kampuni ya Katani imechangia bati 20 na  na misumali.

Akiupongeza uongozi wa Wilaya ya Korogwe kwa mikakati mizuri wakati wa Mkutano wa hadhara,  mkazi wa  kijiji cha Patema  Kata ya Mpale Bw.Omari Baruti amesema maendeleo ya nchi huletwa na mwananchi mwenyewe kwa kujituma hivyo yuko tayari kushirikiana na kijiji katika kutimiza azama yake ya ujenzi wa maabara.

Nao wanafunzi wa Shule ya Sekondari Patema kata ya Mpale ambapo ndiko ujenzi wa maabara umezinduliwa, wamefurahishwa na juhuzi hizo za serikali kwani wanaona kuwa maabara hizo zitakuwa mkombozi kwa wanafunzi wa sayansi ambao wana changamoto ya kusoma bila vitendo.

Mkakati wa kushirikiana kuleta maendeleo katika Wilaya ya Korogwe unahamasishwa na msemo usemao Panga, tekeleza ,onesha Mafanikio na Hakuna kulala hadi kieleweke”

 Mkuu wa Wilaya ya Korogwe Mhe. Mrisho Gambo akimkaribisha  Mkuu wa Mkoa Mhe. Chiku Gallawa kuongea na watumishi wa Halmashauri za Wilaya

Mwakilishi wa Kampuni ya Katani Bw. Grayson Mmyari akimkabidhi Mkuu wa Mkoa Mhe. Chiku Gallawa  mabati 20 na misumari kwa ajili ya ujenzi wa maabara

Mbunge wa Korogwe Vijijini Mhe. Steven Ngonyani  akitoa mchango wa shiling laki tano  kwa ajili ya ujenzi wa maabara

 

 Baadhi ya Watumishi kutoka Halmashauri za Korogwe Mji na Vijijini