Halmashauri Muheza Kuongeza Ukusanyaji Mapato ya Ndani

Mkurugenzi Mtendaji wa Halmashauri ya Muheza, Bw. Ibrahim Matovu

HALMASHAURI ya Wilaya ya Muheza inatarajia kukusanya Shilingi Bilioni 1 katika mwaka wa fedha ujao wa 2013/2014 kutoka katika vyanzo mbalimbali vya mapato ikiwemo mabango ya matangazo ya biashara pamoja na minara ya mawasiliano ya simu za mkononi.

Hayo yamebainishwa na Mkurugenzi Mtendaji wa Halmashauri ya Muheza, Ibrahim Matovu wakati akijibu maswali ya wajumbe wa kamati ya Kudumu ya Bunge ya Hesabu za Serikali za Mitaa(LAAC) ilipofika kwa mahojiano mjini humo hivi karibuni

Alisema katika kuhakikisha makusanyo hayo yanapatikana tayari Halmashauri imetuma timu ya wataalam kupita katika maeneo mbalimbali ya mjini na vijijini wilayani humo kwa ajili ya kuhakiki aina tofauti za mabango ya matangazo zilizopo ili waweze kuyawekea viwango vya tozo.

Matovu alisema lengo ni kupunguza changamoto zinazowakabili hivi sasa katika ukusanyaji wa mapato ya halmashauri ili hatimaye waweze kufikia lengo lao hilo katika mwaka wa fedha ujao.

“Tumefanikiwa kuongeza kiwango cha makusanyo kila mwaka na hivi sasa kwa mwaka huu wa 2012/2013 tumekusanya kiasi cha sh. Milioni 856 kiwango ambacho kimevuka lengo letu la makusanyo tulilokuwa tumelikadiria awali’, alisema na kuongeza.

“Makisio yetu katika bajeti ya mwaka ujao wa fedha ambayo tayari tumeanza maandalizi ni kukusanya sh. Bilioni moja na tunaamini tutafikia lengo hili kwasababu tumejipanga vizuri na tunaboresha mifumo ya ukusanyaji ikiwemo kuwafuta mawakala wanaoshindwa kufikisha malengo ya makusanyo ”,alisema.

Awali wajumbe wa kamati hiyo akiwemo Kangi Ligora alihoji kutaka kujua mfumo wanaotumia katika ukusanyaji wa mapato kutoka katika baadhi ya vyanzo hasa Mabango ya matangazo na Minara ya mawasiliano ya simu.

“Nataka kujua hapa Muheza kama mnakusanya fedha kutoka katika mabango yote ya matangazo yaliyopo kwasababu uzoefu uliopo katika halmashauri nyingi hawakusanyi na hatua hii inakosesha halmashauri nyingi mapato kwa madai kwamba wamiliki wengi wa mabango hayo hawajulikani walipo “ alisema.

“Ushauri wangu katika hili nawatuma kwamba katengenezeni mgogoro na wenye mabango hasa kwa kuanza kuyang’oa hayo mabango yao badala ya kuyawekea alama ya x  ...naamini kwa kufanya hivyo ndipo mtaweza kuwapata wamiliki wake na watawalipa fedha yenu”,alishauri.

Kwa upande wake Mbunge wa viti maalum Vijana kutoka Zanzibar, Tauhida Galoss aliitaka halmashauri hiyo kwenda kujifunza namna bora ya ukusanyaji wa mapato katika mabango ya matangazo katika manispaa ya Ilala iliyoko jijini Dar es salaam ambao alidai wamefanikiwa sana katika suala hilo.

Akifunga mjadala wa hoja hiyo, Mwenyekiti wa kamati hiyo ya LAAC, Rajabu Mbarouk aliipongeza halmashauri hiyo kwa kuendelea kuongeza kiwango cha ukusanyaji wa mapato ya ndani kila mwaka na kuwataka waongeze juhudi katika ukusanyaji kodi itokanayo na chanzo cha Mrabaha wa minara ya mawasiliano ya simu.

“Katika hili la kodi ya minara ya simu za mkononi naomba nalo mwende mkajifunze katika halmashauri ya wilaya ya Kilindi kwasababu wao wamepambana na sasa wanapata mrahaba wao kutoka kwa kampuni zote za simu za mkononi zenye minara ndai ya wilaya hiyo”, alisema. Habari na Anna Makange- Habari Leo