Kamati Ya Bunge ya LAAC Yapongeza Utekelezaji Miradi Korogwe Mji

KAMATI ya Kudumu ya Bunge ya Hesabu za Serikali za Mitaa(LAAC) inayoendelea na ziara yake mkoani Tanga imepongeza utekelezaji wa miradi tisa ya maendeleo waliyoikagua katika halmashauri ya Korogwe mji na kusema inaonesha thamani halisi ya fedha.

Miradi hiyo ya maendeleo ikiwemo iliyokaguliwa na kamati hiyo ni ile iliyopita fedha ya ruzuku ya serikali ya jumla ya sh. 2,109,298.95 ambayo ilipitishwa na Bunge katika bajeti ya mwaka wa fedha wa 2011/2012.

Hayo yamebainishwa wakati wa ziara ya wajumbe wa kamati hiyo mjini Korogwe.

Miradi hiyo imejumuisha ujenzi wa vyumba vya madarasa, ukarabati wa skimu ya umwagiliaji maji Kwamngumi, kuchimba visima vya maji Kwakombo na Kwameta na ujenzi wa Maabra.

Wakizungumza kwa nyakati tofauti mara baada ya ukaguzi wa miradi hiyo Mwenyekiti wa Kamati hiyo, Rajabu Mbarouk alisema utekelezaji wa miradi hiyo waliyoitembelea umewapa faraja kutokana na uhalisia wake.

“Miradi yote kwa kweli imetuvutia sana kila kitu ikiwemo mikataba, taratibu za manunuzi na mambo yote muhimu yamezingatiwa na jambo zuri zaidi ni  kuonekana kwa thamani halisi ya fedha hizo za umma ki msingi tunawapongeza sana watendaji hawa”, alisema.

Aidha, aliwataka watendaji kwa kushirikiana na baraza la masiwani kuendelea kuwa wabunifu na kuhakikisha utekelezaji wa miradi yote ya maenedeleo inaonesha thamani halis ya fedha ili kuiwezesha kuondoa kero na kukidhi malengo yaliyokusudiwa.
Stori na Anna Makange- Habari Leo