Kata ya Kwamsisi Yapatia Mil 621 Kwa Ajili ya Ujenzi wa Mradi wa Maji

Diwani wa Kata ya Kwamsisi Wilaya ya Korogwe Mji Nassor Hassan ameishukuru Wizara ya maji pamoja na Benki ya Dunia kwa kuwapatia ufadhili wa fedha Sh Mil 621 kwa ajili ya kujenga mradi wa maji ambao ukikamilika utasaida  kuondoa kabisa kero ya maji .

Akitoa shukrani zake  hapo jana wakati wa utambulisho wa viongozi wa bodi ya maji kwenye kata hiyo ambao watakuwa na jukumu la kusimamia ujenzi wa mradi  hadi kukamilika kwake na pamoja na kusimamia huduma ya maji na miundombinu yake isiharibiwe na wananchi .

Alisema kuwa mradi huo umekuja wakati muafaka  kwani  kata hiyo ilikuwa  inakabiliwa na changamoto ya upatikanaji wa maji safi na salama kwa muda mrefu hali iliyowalazimu wakati mwingine kununua maji ndoo moja kwa kiasi cha Sh 500 kutoka kwa wauzaji wenye magari.

“Tunaishukuru Wizara ya Maji kuleta mradi wa maji wa kata kumi kwenye wilaya hii na kata hii kwani tulikuwa na upungufu mkubwa wa maji ,tunapata maji kwenye visima vifupi ambavyo ukichota zaidi ya ndoo tano vinakauka na inawalazimu kina mama wasubiri kwa muda mrefu ilikupata maji”alisema Diwani Hassan.

Pia aliitaka bodi hiyo kuhakikisha inamsimamia mkandarasi aliyepewa kazi ya ujenzi kuhakikisha anamaliza mradi ndani ya miezi sita ya mkataba waliokubaliana na ujenzi unalingana na thamani ya fedha zilizotumika na sio ubabaishaji.

Hassan alisema kuwa sera ya maji ya mwaka 2007 imeelekeza kuwa  jamii ya vijijini kusimamia utunzaji wa raslimali ya maji,chanzo cha maji na mazingira ya eneo la chanzo pamoja na miondombnu iliyopo ili kuhakikisha huduma hiyo inakuwa endelevu na yenye tija kwa wakajiji wa eneo husika.

Na Amina Omari, Korogwe