Katibu Tawala Mkoa wa Tanga Ahamasisha Umuhimu wa Bima ya Afya

Katibu Tawala Mkoa wa Tanga Bw.Benedict Ole Kuyan akizungumza na wadau wa Bima ya Afya wa Mkoa wa Tanga (hawapo pichani) kwenye ukumbi wa mikutano wa Ofisi ya Mkoa wakati wa kikao cha mwaka cha wadau wa Bima ya Afya

Wadau wa Bima ya Afya Mkoa wa Tanga wakiwa Kwenye Ukumbi wa Mikutano Ofisi ya Mkoa wa Tanga waliokaa mbele kutoka kulia ni Mkuu wa Wilaya ya Kilindi Mhe.Selemani S. Liwowa, Mkuu wa Wilaya ya Handeni Mhe.Muhingo Rweyemamu na Mkuu wa Wilaya ya  Lushoto Mhe.Majid H. Mwanga

Baadhi ya wadau wa Bima ya Afya Mkoa wa Tanga  walioshiriki kwenye Mkutano wakiwa Ukumbini. Kutoka kushoto ni Mkuu wa Wilaya ya Mkinga Mhe. Mboni Mgaza, Mstahiki Meya wa Jiji la Tanga Mhe.Omari Guledi 

Wadau wa Bima ya Afya Mkoani Tanga wamekutana wajadili kwa mapana jinsi ya kuboresha upatikanaji wa huduma za matibabu katika Hospitali, Vituo vya Afya, Zahanati na Maduka ya dawa yaliyosajiliwa na Mfuko huu na kuweka mikakati ya kudumu ya kuimarisha huduma hizo. Mkutano huo umefanyika katika Ukumbi wa mikutano katika Ofisi ya Mkuu wa Mkoa ambapo Katibu Tawala Mkoa wa Tanga  Bw. Benedict Ole Kuyan amebariki Mkutano huo.

Akizungumza kwa niaba ya Mkuu wa Mkoa wa Tanga, Bw. Ole Kuyan amesema kuwa hadi sasa takwimu zinaonyesha kuwa kufikia Oktoba 30, 2013 hamasa ya kujiunga na Mfuko wa Bima ya  Afya ya jamii Mkoa wa Tanga hairidhishi kwani ni asilimia10% wamejiunga.

“Hali hii inaonyesha kuwa viongozi watendaji na wadau wengine hatujatimiza wajibu wetu kikamilifu katika kuhamasisha wananchi hivyo ninatoa wito kwa kila mmoja kuona umuhimu wa kuhamasisha wengine kujiunga na Mfuko wa Bima ya Afya”

Akipongeza juhudi za Mfuko wa Afya ya jamii, Bw. Ole Kuyan amesema kuwa wakazi wa Tanga wamefarijika sana kwa kuwepo kwa mradi wa afya ya mama na mtoto maarufu kama KFW. Mradi huu unatoa mchango mkubwa kwa Mkoa wa Tanga kuweza kufikia lengo la 4 na 5 la Millennia la kuimarisha afya ya uzazi na kupunguza vifo vya mama na mtoto. Zaidi ya familia 40,000 zinanufaika na mradi wa KFW.

Wito umetolewa kwa wanachama wote wa bima ya Afya kuacha tabia ya kuhujumu kadi zao za matibubu bali wazitunze kadi hizo na kuacha utaratibu wa kuazimishana kadi za matibabu na hata kuzifanyia biashara.

Nao watoa huduma ya afya wameaswa kutoa huduma kwa wanachama wa NHIF na CHF sawa na wananchi wengine bila ubaguzi kwa sababu kumekuwepo na tabia hiyo.