TANROADS Yalia na Wahujumu Barabara

Meneja wa TANROADS Eng. Alfred Ndumbaro amewataka wakazi wa Tanga kuenzi barabara zilizojengwa katika Mkoa wa Tanga kwa kuacha kuhujumu barabara hizo. Rai hiyo imetolewa wakati wa kikao cha cha pili cha mwaka cha bodi ya barabara wakati akiwasilisha changamoto zinazomkabili wakala wa barabara katika utekelezaji wa majukumu yake. Kikao cha Bodi ya Barabara   kinafanyika katika Ukumbi wa Ofisi za Mkuu wa Mkoa leo hii na Mwenyekiti wake akiwa Mkuu wa Mkoa wa Tanga Mhe. Chiku Gallawa.

Eng. Ndumbaro amebainisha kuwa wananchi wamekuwa na tabia ya kuhujumu miundombinu ya barabara kwa wizi wa alama za barabarani pamoja na ung’oaji wa makalvati ya chuma, ung’oaji wa mawe yanayojengwa katika barabara kwa lengo la upimaji na kumbukumbu za kitaalamu, ulimaji wa mashamba karibu sana na barabara unaosababisha mmomonyoko wa ardhi na hivyo kusababisha mifereji ya barabara kujaa udongo na takataka kila wakati.

Akihoji mchango wa wananchi katika kuenzi juhudi za Serikali katika kuboresha barabara, Eng Ndumbaro amesema kuwa ni kawaida kuona mifugo ikipita katikati ya barabara kana kwamba wananchi hawajali wala hawajui madhara ya tabia hiyo licha ya elimu na maonyo mengi kutoka kwa Serikali.

Umefika wakati sasa wananchi kujua kuwa Serikali kwa kushirikiana na wadau wa maendeleo inatumia  fedha nyingi katika kujenga na kukarabati barabara katika Mkoa wa Tanga.

Ni wito wa TANROADS kwa wananchi kutunza barabara Mkoani Tanga ili ziweze kudumu kwa muda mrefu hasa zilizojengwa kwa kiwango cha lami kwa kutozidisha uzito wa mizigo, kutojenga kwenye eneo la hifadhi ya barabara, kutunza na kuheshimu alama za barabarani na mwisho wananchi waelewe Barabara nzuri ni kwa maendeleo ya Mkoa na Taifa kwa ujumla.