Maonesho ya biashara na uwekezaji kujumuisha mataifa 30 mei 2014 Mkoani Tanga .

Maonesho ya biashara ya kimataifa yaliyofanyika mwaka jana kwa mara ya kwanza jijini Tanga ambayo  yaliandaliwa na ofisi ya Mkuu wa Mkoa wa Tanga kwa ushirikiano na Tantrade mwaka huu yanatarajiwa kufana zaidi kwa kuwa yatajumuisha mataifa 30 tofauti na mwaka jana ambapo ni mataifa 8 tu yalishiriki.

  Hayo yamesemwa na Mwenyekiti wa TCIAA mkoa wa Tanga  Paulo Bisoki wakati wa kikao kazi kati ya Mkuu wa Mkoa wa Tanga na maafisa Uwekezaji Viungo “Focal persons” wa Halmashauri zote za Mkoa   kilichofanyika jana katika ukumbi wa mikutano wa ofisi ya Mkuu wa mkoa.

Bisoki aliongeza kuwa maonesho hayo yatakayofanyika kwa siku kumi mwezi Mei katika viwanja vya Tangamano mwaka huu yameboreshwa zaidi kwa kuwa yatakuwa ni maonesho ya biashara na uwekezaji ambayo yatawakutanisha kwa pamoja wajasiriamali wadogo na wawekezaji wanaotafuta fursa za kuwekeza katika mkoa wa Tanga na hivyo kuwataka maafisa viungo wa uwekezaji kujiandaa kikamilifu.

“Katika siku hizo kumi kutakuwa na siku maalumu za kukutana kati ya wawekezaji na maafisa viungo wa  uwekezaji ili kufafanua zaidi fursa zilizopo katika maeneo yenu,mtapanga siku watembelea hayo maeneo na kujionea wao wenyewe hivyo mjiandae vilivyo”alisema Bisoki.

Kwa upande wake Mkuu wa Mkoa wa Tanga Mh.Chiku Gallawa aliwataka mafisa hao kutambua kuwa nafasi waliyoipata ni nyeti na ina changamoto kwani kazi kubwa waliyonayo ni kuwakwamua kiuchumi wananchi wa mkoa wa Tanga kutoka hali duni walizonazo  kupitia uwekezaji.

“Kazi mliyopewa inahitaji umakini na unadhifu hasa katika suala la mawasiliano ambayo yanapaswa kufanyika kwa wakati na kumvutia Mwekezaji hadi kivutio kimoja kinapopata Mwekezaji,jukumu lenu ni kuwatoa Wananchi katika lindi la umasikini kwa kuingia ubia na wawekezaji na si kugeuzwa manamba.” Aliongeza Gallawa.

Kadhalika Mh.Gallawa aliziagiza Halmashauri zote kutenga maeneo maalum na kuyaweka tayari kwa ajili ya uwekezaji wa viwanda na kuongeza kuwa msukumo wa uwekeaji unaelekezwa zaidi katika ujenzi wa viwanda ili kuwakwamua vijana wengi wasio na ajira na tayari balozi tatu nchini zipo tayari kusaidia katika uwekezaji huo wa viwanda.

Maonesho hayo yatakayofanyika mwezi Mei itakuwa ni mwendelezo wa jitihada za kuinua pato la mkaazi wa Tanga kufikia Tsh 1,500,000/-ambapo Septemba 2013 lilifanyika kongamano la uwekezaji ambalo lilijumuisha mikoa ya kanda ya Kaskazini ya Kilimanjaro,Arusha,Manyara na Tanga waliokuwa wenyeji wa kongamano hilo.

Maafisa uwekezaji wa Halmashauri za Mkoa wa Tanga wakimsikiliza Mkuu wa Mkoa kabla ya kuanza kuwasilisha mipango kazi yao.

Afisa uwekezaji Halmashauri ya wilaya ya Korogwe Lameck Kajala akiwasilisha mpangokazi wa Halmashauri yake