Watakiwa kutumia muda vizuri na kutenda kwa haki

Mkuu wa mkoa wa Tanga, Chiku Gallawa amewataka wanasiasa na watendaji wa serikali katika ngazi mbalimbali mkoani hapa kuacha tabia ya kufanya kazi zao kwa mazoea badala yake watumie muda vizuri na kuhakikisha wanamtendea haki kila mtu wanayemhudumia bila kujali alivyo.

Ametoa mwito huo mwishoni mwa wiki wakati akifunga mkutano wa pamoja (Inter Council Meeting) uliojumuisha wakuu wa wilaya, makatibu tawala, wenyeviti wa halmshauri, wakurugenzi watendaji, maofisa mipango, utumishi na maofisa tarafa kutoka wilaya zote nane zinazounda mkoa huo.

Lengo la mkutano huo maalum wa kazi uliofanyika kwa siku mbili wilayani Handeni lilikuwa ni kuwaleta pamoja watendaji hao kubadilishana uzoefu, kuondoa tofauti na kujengana ili waweze kuwa timu moja katika utendajikazi itakayoharakisha maendeleo mkoani humo.

“Ndugu zangu tumepewa dhamana kubwa ya kuongoza wakazi wa Tanga kwahiyo kila mmoja wetu mahali alipo yampasa kujitambua na kubadilisha mazoea mabaya kwa kuamua mwaka huu kutenda kwa haki na kutumia muda wa kazi vizuri kwa ajili ya kuleta mabadiliko chanya ya kijamii na kiuchumi yatakayomfanya kila mwananchi kufurahia maisha alipo”, alisema na kuongeza.

“Ni vema tukaona mbali tukaongeza ubunifu na pia tufikirie zaidi na kujaribu kutumia kwa hekima fursa zilizopo pamoja na rasilimali fedha tunazopewa na serikali kwa ajili ya kuondoa kero zinazowakabili wananchi ili wapate maendeleo ya kweli”.

Akizungumzia hali ya Usalama na Amani iliyopo sasa alisema kuna haja kwa wao kuendelea kuwashauri na kuwasaidia wananchi kwa kuwapa miongozo itakayowawezesha kufanya shughuli zao za kilimo na ufugaji kwa tija ili wajikwamue ki uchumi badala ya kuwatelekeza.

“Naomba tusijaribu kutengeneza “gap” kubwa kati ya wananchi walionacho na wale wasionacho hii ni mbaya sana kwa kuwa uzoefu unaonesha hiyo ni miongoni mwa sababu zinazochochea wananchi kuleta machafuko kwenye jamii.

“Siku zote mahali penye njaa na maradhi hapana utulivu kwa hivyo ni jukumu letu sisi viongozi hapa kuhakikisha kila mwananchi anafikiwa na maendeleo yatakayosababisha afurahie maisha na ndipo tutaweza wote kuishi mahali penye amani na utulivu”, alisema Mh.Gallawa.

Aidha, akizungumzia namna ya kuwezesha wananchi ki uchumi aliwataka wakurugenzi watendaji wa halmashauri zote 11 za mkoani humo kuhakikisha wanatenga asilimia 10 ya makusanyo yao kwa ajili ya kuviwezesha mitaji vikundi vya vijana na wanawake.

“Wakurugenzi  acheni kupata kigugumizi wakati wa kutoa ile asilimia 5 kwa ajili ya mfuko wa vijana na ile 5 nyingine ya wanawake hiyo ni haki yao kwa mujibu wa sheria kadhalika na ile ruzuku kutoka serikalini kwa ajili ya vijiji nayo wapeni wapange shughuli zao za kuwakwamua kiuchumi acheni kuzipangia matumizi mengine ya ofisi”, alisema.

 Mkurugenzi Mtendaji wa Halmashauri ya wilaya ya Korogwe Lucas Mweri akiwasilisha mpango mkakati wa Halmashauri yake kuhusiana na utekelezaji wa BRN.