RC awataka wakurugenzi kuhimiza kilimo cha mtama ili kukabiliana na tishio la njaa Mkoani Tanga.

Mkuu wa mkoa wa Tanga,Mh. Chiku Gallawa amewaagiza Wakurugenzi Watendaji wa halmashauri za wilaya mkoani humo kutenga fedha kwa ajili ya kukunua mbegu ya Mtama ili waweze kuigawanya kwa wakulima msimu huu wa kilimo.

 Utekelezaji wa haraka wa agizo amesema utasaidia kuongeza uhakika wa chakula hasa mtama ambao unauwezo mkubwa kuhimili ukame kuliko zao la mahindi pamoja na kupunguza tatizo kubwa la njaa linalowakabili baadhi ya wananchi kila mwaka.

 Ametoa mwito huo jana wilayani Handeni wakati akifungua kikao cha kazi kilichojumuisha watendaji wa sekretarieti ya mkoa, wakuu wa wilaya na maofisa tarafa kwa lengo la kuharakisha utekelezaji wa mpango wa tekeleza sasa kwa matokeo makubwa(BRN).

 Amesema ili kuwawezesha wakulima kuongeza tija kwa kulima mazao yenye uhakika kuna haja ya kuwahamasisha kwa kuwagawia bure mbegu ya Mtama kuanzia msimu huu wa Masika badala ya kuwaacha waendelee kulima Mahindi kwa mazoea.

 “Wakulima hawana budi kuanza kubadili fikra na mtazamo wao potofu kwamba zao la Mahindi ndio pekee linaloweza kuwapatia chakula na kuwakwamua ki uchumi ni Mahindi badala yake waanze kulima Mtama ambao hauhitaji mvua nyingi na hivyo kuwezesha kupata fedha za kununulia vyakula vingine ikiwemo Mahindi”, alisema.

 Aidha, aliwataka Maofisa Ugani kuhakikisha wanatumia vema kipindi hiki kwa kuwakumbusha wakulima umuhimu wa kuandaa mashamba yao na kutumia mvua za kwanza za msimu wa Masika utakao anza hivi karibuni kwa ajili ya kupanda mazao badala ya kusafisha mashamba.

 “Maofisa Ugani acheni kukaa ofisini hivi sasa nendeni vijijini mkawakumbushe wakulima ili waandae mashamba yao kwa ajili ya Msimu wa Masika ili mvua za kwanza zitakaponyesha wazitumie kupanda mazao yao badala ya kusubiri inyeshe ndipo waandae mashamba kwa kufanya hivyo watachelewa”, alisema.

 Alisema uzoefu unaonesha kwamba idadi kubwa ya wakulima bado wanafanya shughuli zao kwa kubahatisha na hivyo wanashindwa kutumia vizuri kiasi cha mvua kinachopatikana kila msimu hatua inayoathiri uzalishaji wa mazao ya chakula.

Mkuu wa Wilaya ya Handeni, Mh.Muhingo Rweyemamu aliyekuwa mwenyeji wa mkutano huo akimkaribisha Mkuu wa Mkoa kufua Mkutano.

Baadhi ya Wakuu wa Wilaya za Mkoa wa Tanga wakifuatilia mjadala katika mkutano huo.Toka kushoto ni Wah.Mboni Mgaza (Mkinga),Subira Mgalu (Muheza), na Hafsa Mtasiwa (Pangani).

Baadhi ya Wajumbe wa kikao cha Sekretariet ya Mkoa waliohudhuria mkutano huo katika ukumbi wa Hill town View Hotel mjini Handeni.