Hotuba Ya Mkuu Wa Mkoa Wa Tanga Mhe. Chiku A.S. Gallawa Katika Ufunguzi Wa Semina Ya Utoaji Wa Elimu Ya Sekta Ya Hifadhi Ya Jamii Kwa Viongozi Na Watendaji Wa Mkoa Wa Tanga; 23 Julai, 2014 Katika Ukumbi Wa Ofisi Ya Mkuu Wa Mkoa Tanga

HOTUBA YA MKUU WA MKOA WA TANGA MHE. CHIKU A.S. GALLAWA KATIKA UFUNGUZI WA SEMINA YA UTOAJI WA ELIMU YA SEKTA YA HIFADHI YA JAMII KWA VIONGOZI NA WATENDAJI  WA MKOA WA TANGA;  23 JULAI, 2014  KATIKA UKUMBI  WA OFISI YA MKUU WA MKOA TANGA.

Ø Ndugu Mwakilishi wa mkurugenzi  Mkuu wa SSRA.

Ø Ndugu wafanyakazi wa SSRA.

Ø Ndugu washiriki,

Ø Ndugu waandishi wa  habari

Ø Ndugu wageni waalikwa, mabbi na mabwana

Asalam  aleykum.

Kwanza kabisa naanza kwa kumshukuru mwenyezi Mungu kwa kutujaalia  Uhai na Afya njema na kuweza kuhudhuria  Mkutano huu muhimu kwa wadau wa Sekta ya Hifadhi ya Jamii. Aidha nichukue fursa hii pia kuwakaribisha  sana Jijini Tanga wageni wetu wote. Naelewa kwamba washiriki wa Semina hii ni watendaji kutoka Ofisi yangu, Halmashauri za Mkoa waTanga na ytaasisi nyingine ndaqni ya Mkoa wa Tanga hivyo ningependa kuwakumbusha lengo na madhumuni ya Semina  hii kwa urahisi wa rejea zenu.

Ndugu mwenyekiti wa  mkutano na washiriki,  lengo kubwa la Semina hii ni kutoa uelewa  wa  kutosha kuhusiana  na shughuli za Mamlaka ya usimamizi  na udhibiti wa Sekta ya  Hifadhi za Jamii (SSRA), pamoja na uendeshwaji wa Sekta nzima ya Hifadhi ya Jamii kwa ujumla wake, hasa ikizingatiwa kwamba watanzania wengi hawana uelewa wa kutosha kuhusiana na shughuli za (SSRA).

Ndugu Mwenyekiti na washiriki, Nimeona ni muhimu kwa ufupi kujua  maana ya SSRA na azima yake katika kuboresha Sekta ya Hifadhi ya Jamii Tanzania kwani Hifadhi ya Jamii ni kwa watanzania wote.

Mamlaka ya Usimamizi  na Udhibiti wa Sekta ya Hifadhi ya Jamii iliundwa kwa Sheria Na. 8 ya Hifadhi ya Jamii ya mwaka  2008 na kufanyiwa marekebisho kwa  Sheria namba 5 ya mwaka  2012 kwa lengo la kusimamia na kudhibiti Sekta ya Hifadhi ya Jamii kwa  Manufaa ya wanachama na Taifa kwa ujumla Mamlaka ilianza kazi rasmi mwishoni mwa mwaka 2010.

Hivyo kuundwa kwa Mamlaka hii ni sehemu ya utekelezaji wa Sera ya Taifa ya Hifadhi ya Jamii ya mwaka 2003 na malengo  ya Milenia,  MKUKUTA pamoja na  Dira ya       Maendeleo 2025.

Mamlaka ina jukumu la kusimamia shughuli zote za Hifadhi ya Jamii nchini ikiwa ni pamoja na  Mifuko yote ya Hifadhi ya Jamii iliyoanzishwa kwa Sheria ya Bunge. Mifuko hii ni pamoja na PPF, NSSF, PSPF, GEPF, NHIF na LAPF. Mamlaka inahakikisha kwamba mifuko inakuwa endelevu, mifuko inaendeshwa kwa kufuata Kanuni na taratibu za Kisheria, wanachama wanapata  taarifa za mifuko yao, mafao yanaboreshwa kwa maslahi ya Taifa kwa ujumla.

Ndugu mwenyekiti na wajumbe, Kuanzishwa kwa SSRA kulifanywa ili kuhakikisha kwamba Sekta ya Hifadhi ya Jamii inaendeshwa kwa Mujibu wa Sheria na Kanuni hii ikiwa ni pamoja na kulinda Haki za wanachama, kuongeza upana na huduma za Hifadhi za  Jamii na kuzifanya huduma hizi kuwa endelevu.

Ndugu Mwenyekiti na Washiriki, Kwa kifupi pia nizungumzie Sera ya Taifa ya Hifadhi ya Jamii ya mwaka 2003. Sera hii ilitungwa kutokana na mabadiliko ya Kijamii, Kiuchumi na Kisiasa hapa nchni, ili kuhakikisha kuwa wananchi wanafaidika na mfumo mzima wa Sekta ya Hifadhi ya Jamii, ambao utakuwa endelevu.

Hivyo basi,  Sera ya Taifa ya Hifadhi ya Jamii, imetokana na majadiliano ya Wadau mbalimbali ambayo yalianza tangu  mwaka 2001. Baada ya hapo Serikali iliridhia na kupitisha  Sera hiyo rasmi 2003. 

Nia kubwa ya Sera hii ni kutekeleza Dira na kuhakikisha kuwa kufikia mwaka  2025 Sekta ya Hifadhi ya Jamii ni kwa watanzania walio wengi.

Ndugu Mwenyekiti na  Washiriki, Lengo kubwa  la Hifafhi ya Jamii ni kuwezesha wananchi kuishi maisha yenye  staha kwa kuwawezesha kuapata huduma za msingi pale wanapopata majanga mbalimbali kama  vile  Uzee, Ugonjwa, Uzazi kwa Mujibu wa Mafao mbalimbali yanayotolewa na mifuko hiyo hata kabla ya kustaafu mwananchama anaweza kupata fedha za kumsaidia kufanya mambo mbalimbali kama vile kusomesha watoto, kujenga nyumba na  kukabiliana na majanga mbalimbali.

Ndugu Mwenyekiti na washiriki, tunapozungumzia dhana ya Hifadhi ya Jamii kwa wote  tunaona kuwa hapo awali mifuko ilipoanzishwa ililenga kuwahudumia wafanyakazi na sio watumishi wote. Sera ya mwaka  2003 imeeleza mifuko ya Hifadhi ya Jamii ihudumie watu wote wakulima wafanyakazi, wafanyabiashara, wajasiriamali watu waliojiajiri wenyewe na wazee, hivyo basi inatoa fursa ya Hifadhi ya Jamii  kwa wote. Kauli mbiu  hii inaendana  sambamba na Sera ya  Wigo wa huduma ya Hifadhi ya Jamii ili iweze kumfikia  kila Mtanzania, Serikali inapenda kuona watanzania wengi iwezekanavyo wanajiunga na Hifadhi ya Jamii nchini bila kujali anatoka kwenye Sekta rasmi au isiyo rasmi.

Hivi sasa Sheria ya SSRA inaruhusu mtu yeyote wa Sekta yoyote kuwa mwanachama wa Mifuko ya Hifadhi ya Jamii. Hifadhi ya Jamii inahusisha wote walio katika sekta rasmi na isiyo rasmi.

Ndugu Mwenyekiti na washiriki, Mwisho nichukue fursa hii kuishukuru sana Mamlaka ya usimamizi wa sekta ya Hifadhi ya Jamii kwa kuamua kuja kutoa elimu ya Hifadhi ya Jamii kwa Viongozi  na  Watendaji wa Mkoa wa Tanga na pia kwa kunipa heshima ya kufungua Semina hii muhimu ya utoaji wa Elimu juu ya Sekta ya Hifadhi za Jamii. Nawashukuru pia washiriki Mliojitokeza kutoka Mkoa huu wa Tanga ambao ni muhimu kwetu sisi kama  wawakilishi na watendaji wa wananchi wa Tanga. Niwaombe   basi elimu hii tutakayoipata hapa tuifikishe kwa wananchi wote ili nao waelewe namna ya kujiwekea akiba iweze kuwasaidia kujikinga na majanga mbalimbali ya Kiuchumi na Kijamii. Naomba tuwe wasikivu na tuchangie mada zitakazo tolewa.

Ndugu Mwenyekiti na Washiriki, kwa haya machache, napenda kusema kuwa semina hii imefunguliwa rasmi.

Asanteni kwa kunisikiliza